سلسلة حلقات يويمات مخرب صغير ((كاملة لأكشن))

[align=center]الحلقة الثانية
اقسمت فى هذا اليوم بعد عقاب أبى لى بحرمانى من السهر وإغلاق حجرة الالعاب الخاصة بى قررت الانتقام وبعد استقرار هذه الفكرة فى مخيلتى أسرع عقلى بالعمل ويالها من فكرة ستحقق لى ما اريد وانتظرت لصباح اليوم التالى وعلى عكس المتوقع صحيت مبكراوهمس ابى لوالدتى
شفتى بدل ما فيش سهر صحى زى القرد بدرى
وانا كالعادة ولا كأنهم بيجيبوا فى سيرتى
وانتظرت ذهاب أبى وأمى للعمل كالعادة وبسرعة اسرعت بصعود سلم المنزل حتى وصلت إالى شقة عمى ولمحت قفل الباب معلق دون اغلاق وهذا يعنى ان عمى مازال بالداخل وهذه فرصتى ولكنى قصير لا استطيع ان اصل لارتفاع القفل وبسرعة بديهة نزلت الى شقتى مرة أخى وحملت أحد كراسى السفرة والذى كان لطفل مثلى كوزن ثقيل جدا وبمجهود جبار صعدت من الدور الثانى الى الرابع حاملا الكرسى ومنظر عمى بعد المقلب يظهر فى مخيلتى فيعطينى حماسا زائدا كل لحظة وبعد انا وصلت لم اجد صعوبة فى ذلك تسلقت الكرسى ومنه اغلقت القفل وظهرت على وجهى ابتسامة شيطانية ابتسامة طفل منتصر
وبعدها حملت الكرسى الذى أحسست بوزنه خفيفا جدا بالنسبة لحالة الصعود واغلقت الشقة وانا انتظر ولم يستمر انتظارى كثيرا فبعد ربع ساعة او يزيد سمعت صراخ نعم انه عمى مستنجدا بأحد يفتح له الباب وياريتنى كنت موجود لأرى وجه ولكن أصول اللعبة تحتم على السكون والهدوء وبعد نصف ساعة صحى عمى الاكبر وفتح له باب الشقة ونزول
عمى (خالد) لعمله و رن جرس الشقة وبهدوء وبراءة مصطنعة فتحت الباب ووجدت نفس اليد تمتد لتمسك بملابسى لترفعنى عاليا وهو يردد:
( انت عملت كده ليه).
وكالعادة باستهبال أكثر و أكثر: (عملت ايه) .
عمى: ( قفلت باب الشقة لييييييييييييه).
انا: ( باب شقة ايه.....؟؟؟).
وكالعادة حملنى إلى شقته وحكى القصة وانا بطريقة حاولت انا أخفى سخريتى ولكنها ظهرت ولو بضعف و
(ازاى انا وصلت للقفل انت شايفنى قصير).
عمى وانا متأكد انك انت الى عملت كده
انا بعد نفاذ صبرى قولت له بالنص لو عندك دليل ابقى تعالى لى فى شقتى وسيته ونزلت وبعد عودة أمى وسماعها القصة أجرت نفس التحقيق ولكن بلا فائدة وعلى العكس تماما كان أبى مقتنعا بانى لم أفعل هذا لقصرى ولشدة عقابه لى على مسرحية مصرع كليوباترا قصدى مصرع النمل اللى حصلت بالأمس.
ويأتى يوم جديد بعد ستة أيام فقط من يومنا الاخير وتحدث مشكلة الجرس الخاص بالشقة أصابه العطل وحاولت أن اقنع أبى بأنى من الممكن انا أصلحه ولكن أبى بنظرة تقليل منى وردد بأستهزاء أنت).
ومع هذا الكلمة أقسمت أن احاول ماهو مدمر مدمر
وبعد ذهاب أبى وأمى وجميع من يعملون إلى اعمالهم أخرجت أدواتى وأحد الكراسى لاقف عليه وعملت لمدة ثلاث ساعات مافيش رد فعل من الجرس ولكن حدث شىء غير متوقع لقد فتح الباب الخاص بالبيت كله بصوته المميز واسرعت برؤية القادم انه أبى ومعه كهربائى
وبعد الصراخ الداخلى بالألفاظ المتداولة يالهوى ويا مصيبتى ويا خراشى والسؤال الغبى المعتاد أعمل أيه قفلت الجرس أى كلام (حلوانى بالمصرى) وأسرعى بسحب الكرسى بينما أنشغل أبى فى حوار مع جدتى وكم امتننت لجدتى على هذا الحوار وجاء أبى وكل شىء كما كان
ولم يلبث أن نظر الكهربائى للجرس وقال: (الجرس ده حد فتحه قبل كده). وده من المنظر الخارجى
بابا : ( أفتكر لا ).
وهو ينظر لى بطرف عينه و
الكهربائى : (ممكن).
بس وهو ينزع الغطاء الخاص بالجرس واحس أبى بشىء قد يكون أحساس داخلى بوجوةد البركة الخاصة بى على الجرس فرجع إلى الخلف خطوتين ليجد الكهربائى ملقى بجانبه بعد ان صعقه التيار الكهربى وأستمرار فى العمل الروتينى حتى عمل الجرس وذهب الكهربائى الى حال سبيله بقيت انا وأبى والشرر يتطاير من عينه وهو يردد انت ما حرمتش وأسرع خلفى ليمسك بى وأنا من المحبذين لحكمة الجرى نصف الجدعنة (ملحوظة أحيانا الجدعنة كلها)
اسرعت بالجرى وابى خلفى ضاحكا على بقوله قف ومش هعمل لك حاجة وانا زى اللوزة الصغيرة مش عارف يوصل لى لحد منا وصلت لباب الشقة بعد الدوان فى الشقة ونزلت إلى جدتى وأبى خلفى وهنا عملت جدتى بعد دموع التماسيح منى على تهدئة الموقف حتى صعد أبى وطلبت من جدتى انى أنام معاها فى الشقة وافقت على الفور واستمر الحال لاربع أيام وعاد أبى كما كان وعدت للشقة ومرت فترة حتى حدث موقف أخر موقف لا يحتمل. .............[/align]

[align=center]الحلقة الثالثة
(يوم من أيام الدراسة)
عودة اللعنة لعنة التخريب
***********************
اتذكر هذا اليوم جيدا انه يوم الجمعة مساءا من شهر ديسمبر سنة 1993م والسبب اللى حصل ثانى يوم اولا كعادتى أخذت دش ساقع فى هذا اليوم (ماتفهموش غلط قصدى دش بالماء دش الكلام الخاص بالتهزيق بيبقى الصبح) والشيطان لعب بمخى انا اعمل نفسى مريض عشان ما أروحشى المدرسة ثانى يوم وبالفعل اول ما خرجت عطست بجد واستغليت الفرصة وتظاهرت بالكحة (اى كلام يعنى ) بس والدى كان متحفز انه يزعق لى فقال لى انما مش قولت لك تسقع الماء انت كل ما تستحمى تأخذ برد حراااام وقعد يعيد على النصائح الطبية وضروريات وووووووووووووو وانا طبعا أذن من طين والثانية من طين برضه نياههههههههههههههه المهم بابا قال لى خش نام ولو فضلت تعبان تقعد بكره من المدرسة عشان اول ما أرجع من الشغل أوديك للدكتور اعمل ايه ما انت مصيبة من مصائب الزمن (دائما يفتخر بى ) المهم نمت وصحيت بدرى قبل الكل ووضعت مخدة خلف ظهرى وتظاهرت بالاختناق والكحة خلاص هتموتنى ماما صحيت طبعا طابع الحنية أشتغل الفطار فى السرير واللبن كمان (ورايا ورايا) المهم بابا نظر لى وقال لى تستاهل وطبعا كل ده مسلسل عربى منى وكل ده وانا مستنى قرار أبى وأخيرا جاء القرار النهاردة أجازة ومامتى تقول لبابا انها هتقعد معايا وانا فى سرى أقول له (اعمل حاجة فى صالحى مرة بقى ) ومامتى تحاول تقنع بابا والحمد لله بابا أقنعها انها ممكن تقعد معايا فى حالة واحدة لو مت يعنى المهم خرجوا من هنا فتحت التليفزيون على نفس البرنامج الممل صباح الخير العصر قصدى صباح الخير يامصر المهم زهقت جايبيبن واحد بيتكلم فى الجراحة وانا حمار ما بفهمشى طبعا قفلت التليفزيون من الزرار على غير العادة واتبعت بالفيشة وذهبت للعب فى البلكونة بالالعاب الخاصة بى ولكنى سرعان ما زهقت بمرو ر الوقت توجهت للتليفزيون الساعة العاشرة ونصف ولانى من محبى مشاهدة الكرتون (حتى الان طفل بقى ) المهم
جيت أشغل التليفزيون بوضع الفيشة ما اشتغلشى وانطلق عقلى العبقرى اكيد حصل فيه حاجة لازم اصلحه ووجدت يدى الطريق لادواتى بسهولة والتليفزيزن بدا يتساقط قطعة قطعة أصبح حردة وكل ده مش راضى يشتغل وفى ذروة الاحداث طبعا والدى اتعود يجى فى غير معاده (تقولوا البيت بيتى ) وانا نفسى اقول له انه يتصل قبل ما يأتى من الشغل يعرفنى انه جاى ودخل ما اتكلمشى بجد وقف يبرق لى وقال لى حتى التليفزيون ما اترحمشى منك حراااااااااااام عليك يا مفترى وشوية كلام من اللى قلبكم يحيهم يعنى وطبعا مامتى جات وبابا المرة دى مصر يكهربنى لسبب انى ما العبشى فى حاجة وماما اقنعته ان كل الشياطين كده قصدى الاطفال المهم بابا مسكنى بكل طيبة وقال لى احكى لى عملت ايه حكيت له كل حاجة بس عقلى وقف عند حكاية الزرار وعرفت المشكلة انى ماضغطتش على الزرار (عبقرى) بس هو لم يتوقف اخذت بوكس فى وشى رديت زى كرة المطاط له تانى وبابا نزل للكهربائى المسكين نظر لى نظرة غيرة (طبعا ) وانا طبعا بلا مبالة قولت له اى خدمة بنجيب لك شغل اهوه والدى بكل رقة اطلع بره وكانه نسى الدكتور وكل حاجة بس دى كانت اول حكاية فى اليوم ده وبابا طبعا كالعادة حلف لى بس انا كالعادة لا ارى لا اسمع لا اتكلم بل افعل واطنش بلا مبالة المهم الكهربائى اخذ التليفزيون قصدى بقايا التليفزيون وبابا حرمنى من مشاهدة التليفزيون اللى فى حجرة المعيشة وانتهى الموقف ولكن بعد 3 شهور بمناسبة الاجهزة الكهربائية الراديو وقع منى واتحرك مؤشر التردد عن موقعه فالصوت مابقاش واضح زى الاول وانا سمعت فى أحد الافراح التى استخدم فيها مولد كهرباء أن التزييت بيخلى الصوت أحسن وطبعا اخذت الزيت الخاص بماكينة الخياطة الخاصة بوالدتى وفتحت الراديو وزيته والحمد لله الصوت كان هادىء جدا او بمعنى أصح ماكانشى فى صوت غير صوت ضربات قلبى وطبعا والدى عرف وودى الراديو يتصلح ودفع فى تصليحة ثمن راديو جديد وكان عقابى علقة سخنة جدا ومنع المصروف والاغلاق على كل كتبى وقصصى والعابى
لتبدا الاجازة بشىء جديد وحصرى فى الحلقة القادمة سلااااااام
*************
بزمتكم مش طيب [/align]

تدمير الشقة
بعد مرور سنة مليئة بالمواقف المخجلة والمدمرة قرر أبى إعادة طلاء الشقة مرة اخرى (منظرة على
الفاضى ) رغم ان الشقة اتغير طلاءها من سنتين ولسه اللون جميل ولكن تحكمات مامتى بقى (ههه
حد يقدر يقول لا)
وطبعا شغل البيت بيبقى على الكل مش فرد واحد وبما ان الشغل إستغرق فترة طويلة لم تخلوى من
بعض المقالب والدى صحى لقانى داهن وجهى احمر هههههه طبعا كان فى ماتش يومها للاهلى والواحد
أهلاوى من وهو عنده ثانية المهم فى اخر يومين لللى بيدهنوا دخلت حجرة كانت خلاص ساعات
وتكون خلصت لقيت مكان لونه مش فى نفس الدرجة اثقل سنة قولت طيب بدل ما اتعب دماغهم
اخف انا اللون وبسرعة اتجهت إلى علبة النفط (النفط هو سائل يشبه الجاز فى خواصه ولكنه شديد
التأثير يستخدم فى ازالة أثار الدهان وتثبيت الدهان فى أسرع وقت ) طبعا انا ماكنت عارف غير
إزالة الأوساخ فقط (طفل برىء طبعاالمهم اخذت قطعة قماش ورحت على المكان وطبعا اللون بقى
من اللون الرصاصى إلى الابيض المصفر ووشى انا اللى إصفر من الخوف فطبعا شوشو كالعادة لعب
بمخى وخلانى أتهور فرحت ماسك الفرشة فى النفط ودهنت الحجرة كلها بعد مابهدلت نفسى ولولا السلم
كانت هتبقى الحجرة لون ولون وطبعا ياعينى الراجل اتصدم شكله كان مضحك لما جرى يغسل وشه
ورجع وشاف الحجرة كده وبسرعة قال مين اللى عمل كده وطبعا عرف مهارتى فقال لى جملة مش
هنساها لو كنت ابنى كنت رميتك من البلكونة وبعد كده رجع لطابع الحنية وقعد يشرح لى وهو بيجز
على أسنانه من الغيظ فوائد واستخدامات النفط ولم تصبرى امى فبعهد شورين واحد بالماء وواحد بكلام
والدتى نجحت تهربنى على بيت خالى قبل وصول والدى اللى أكيد كان هيستمع لنصيحة الاخ السابق
واتذكر انى قعدت أكثر من اسبوعين ما اذهبشى لبيتى اسبوع قضيته عن خالى والاسبوع الاخر عند
جدتى (والدة مامتى ) المهم رجعت البيت والكل بيعاملنى بجفاء شوية (مش عارف
ليييييييه......؟؟؟؟؟) ممن يكونوا قلقوا على وماصدقوش انى رجعت ممكن المهم
تانى يوم صحيت ولم أجد الافطار شكلى مامتى قالت زى قلته طبعا عملت فقيه ولانى بعمل بالمثل
خالف تعرف يعنى يعملوا فطار ما أكلشى مايعملوشى اجوع حاجة غريبة وطول ما انا بعمل الفطار
عمال اتذكر واجبات الأم وأقول فى ام تنزل من غير ماتفطر ابنها طيب لما ترجع لما أشوف زوجها
لى كلام معاه تانى المهم طبعا بدل الدوشة كنت بعمل بيض مطقش ولانى فتحت التليفزيون وسرحت
نسيت الطبق على النار بس طبعا عرفت من رائحة الشياط ولما دخلت المطبخ ولانه كبير قعدت أخبط
فى حاجات كثير فى طريقى زى الفرن والتقفيل الخاص بالمطبخ وصلت وطفيت البوتجاز رجعت جرى
امام المراءة اشوف وشى بقى شبه فؤاد المهندس فى فيلم عائلة زيزى لكن شكل الهباب خاف من
وشى هو كمان المهم الطبق باظ وقعدت اكلم الطبق استر على يهديك يرضيك اولع فيك مش راضى
ينظف وطبعا الراعى الرسمى لافكارى شوشو لعب تانى بدماغى فقلت هقلب الطبق (النظرية حصرى
لجوجو) المهم جبت الشاكوش ومفكات وبنسة (مش بنسة شعر عارف البنات بتتلكك) المهم قلبت الطبق
خليت ظهره هو وجه والعكس مامتى جات المطبخ نظيف أكثر من اللازم قالت لى فطرت اظهر وجهى
علامة غير مرشدة وهى ما اهتمت المهم بالليل بقى مامتى بتقول حد يجيب لى طبق من المطبخ وعلى
العكس جريت انا لكن اخى أيضا وعلى غير العادة سبقنى وقام على غير العادة ينفذ طلب لوالدتى
ولسوء الحظ أختار الطبق اللى قلبته مامتى مسكت الطبق وقالت طبق مين ده وانا سرحان فى ملكوت
تانى وهى بتفكر قالت لأخى شوف عندك كام طبق فى المطبقية كذا قال لها تسعة أطباق مامتى هنا بصيت
لى قالت لى عملت ايه فى الطبق حراااااااام عليك
شرحت لها الموقف وطبعا ما فهمتنى وانا بقى فى ساعتها أدركت كم ظلم العائلة دى فقلت لهم لو
حد كلمنى تانى هسيب لكم البيت وانزل أعيش عند جدتى وحصل وقعدت شهر عند جدتى
سلاااااااااااااااااااااااااام
أنتظر ردودكم

يويمات مخرب صغير
***********
هاه ياجماعة فاكرنى أنا بتاع المرة اللى فاتت انا نجم انا تاريخ أنا مخ.... بلاش دى المهم عاملين أيه زى ما وعدت بيوم جديد وهو يوم جديد فى كله لانى قفزت فقزة كبيرة يعنى من اولى ابتدائى لأولى ثانوى ده مايعنيش أن مافيش مواقف فى الفترة دى لا دى مليئة بالأخبار والمصائب المخزية وكمان عشان بدا الدراسة المهم وعلى نظام أولى ثانوى القديم كان ال16 مادة فى ترم واحد يعنى لو اينيشتين مش هيبقى كويس غير انى كنت بفصول المتفوقين يعنى مواد وأجزاء زيادة المهم بلا تعقيد وزيادة يا أفضل سادة هنبدا يوم جديد وهو يوم أسود من اوله يومها خسرنا فى التربية الرياضية ( كانوا بيقولوا كبرتوا على العاب دى ) بس برضه ألعاب مع انى صديت ضربة جزاء وفى المجال الزراعى ضربة واحد على مشط قدمه بالفأس والمدرس قعد يتغزل فى قدرتى على التمميز وبصرى الحاد وجينا لحصة التربية القومية وكان مدرسها مدرس جديد وطيب جدا جدا جدا وكا اسمه رمضان والطيبة هنا طيبة مبالغ فيها لدرجة أنه لو واحد قتل له واحد من أقاربه وقال له أسف خلاص هينسى الموضوع كان المدرس يدخل الفصل يشتغل وانا برضه وشلتى نشتغل وكانت فصول المتفوقين فى مبنى المدرسة القديم مع ثانية ثانوى بس فى الدور الأرضى وكان من شلتى واحد اسمه خالد صقر ده قسم المتفجرات فى الشلة وكان بيعمل ما يسمى القنابل الورقية وهى عبارة عن ورقة يقوم بثنيها بطريقة معينة وتصفح مستعدة لاصدار صوت مرتفع عند الضغط عليها بقوة وكنا بنعمل حوالى ثلاثين واحدة ونوزعهم على الفصل واول ما المدرس يدخل يقول قيام كلنا قيام جلوس كل واحد وضع تحت قدمه واحدة يدوس عليها ههههههههه والمدرس ما يعرف منين الصوت بين اصواتها وضحكاتنا ههه دى تعدى والمدرس يقول تلاقيهم بيستقبلونى يلف يكتب الدرس المسئول الإلامى بالشلة يبدأ بالحرب النفسية واهم الكلمات اللى كانت تردد زى رمضان جانا ........ وإطلع من تحت السرير يا رمضان و رمضان إنت جيت ينيلك يا أبو صيام بس فى مرة وبالذات المرة اللى بتكلم عنها صقر والأنصارى اتمسكوا والمدرس أخذهم للمدير انا قولت لازم أنتقم كان عنوان الدرس اللى مكتوب ((الزعيم سعد زغلول)) خليته ((المناضل الشعبى شعبان عبد الرحيم )) وغيرت اللى فى الدرس بس بتغيير حروف بس اشيل حرف أضيف حرف قلبت الدرس نكت ههههههه
المدرس رجع وبيقول درسنا اليوم عن ((سعد زغلول)) هههه الفصل مات من الضحك وانا مسخس على نفسى وشكلى ونظرات الباقيين لى فضحتنى فنادى لى قال لى أكتب اللى هملهولك قولت له ماشى بس مسكت الطباشير بيدى اليسرى هه اصلى مش عبيط مع انى ايمن (انت ايمن ولا جوجو بطل رخامة ) ورفت انه عايز يشوف خطى بالطباشير وطبعا بالشمال كان خطى نكش فراخ وشاف الخط وكان هيسيبنى بس شوشو المرة دى لعب بعقله هو فقال لى خليك هنا وراح يجيب كراستى وشاف الخط وعرف انه خطى قال يسيبنى واقف بره وخلاص ولف يشرح بعد ما عدل الدرس قمت انا ماسى الممحاة (البشاورة) وخليت له السبورة أبيض ياورد وجريت قفزت من الشباك وجرى على البيت وميشو ابن عمى جاب لى كتبتى وشنطتى بس يومها برضه اتعاقبت فى البيت لان المدرس اشتكى لمامتى وهى مدرسة معاه بالمدرسة الموقف القادم هيبقى فى البيت بس مع الكمبيوتر
سلاااااااااااااااااام

ههههههههههههه
انا قريت الموضوع قبل في منتدى هاري بوتر بس مادققت فيه
نفس الحين والله انك كنت شيطووون
انشالله تكملنا مواقفك وماتوقف لحد هنا
قولنا عن مواقف جديده صارتلك
وثاااااااااااااااااااانكس

و لو اني قاريه الموضوع قبل كده الى اني بحبه اوي ..

بجد بحسوا موضوع مميز..

ينفع يتعمل فلم..

صحيح انك كنت شقي بس دي حاجه اساسية في حياة الكائن البشري..

و لا هتبقى الحياه شعارها ملل في ملل

المهم انتظر التكملة..

و لي تعقيب مره اخرى

روزي