علي باب حارتنا

MiDo_313 · منذ /24-03-2007, 05:15 AM

معلش يا جماعة أستحملوني شوية اصلي مهيس ودماغي مش لاقيها تقريبا تاهت والله وأعلم.
ديه بتاعة كده كنت كتبتها تقريبا في شهر 11 اللي فات ومش كاملة وأنا بقلب في اللي كاتبه لاقيتها فقولت مش هاتخسر هنا :1:
***
علي باب حارتنا
" تدور أحداث هذه القصة في أحد أحياء قاهرة المعز لدين الله الفاطمي ...
بينما الشعب المصري كله متكاتف وصامد ضد الأحتلال الأنجليزي لمصر ، وينادي بعودة "سعد باشا زغلول"
من منفاه ( فين الله أعلم )."
ملحوظة:
( بالطبع الذي ينادي هو الشعب المصري وليس أنا ).

وبينما تهز المظاهرات أركان جمهورية مصر العربية لمحنا بعض الأشياء الغريبة تحدث في احدي حوارينا المصرية ... فهيا بنا نلعب. أوبس.
فهيا بنا نلقي نظرة عن قرب لما يحدث خلف باب حارتنا.

زي ما أنتم شايفين وده شئ مشكوك فيه بالطبع بس ما علينا ، إحنا دلوقتي واقفين قدام القهوة ولو كنت قاعد علي يميني مش هاتشوف حاجة ، إنما لو كنت قاعد علي شمالي هاتشوف ايه ؟؟؟
هاه محدش عارف ، طيب خلاص هجاوب أنا والجايزة من نصيبي.
مش هاتشوف حاجة طبعاً لأن ديه قصة خيالية.
بعيداً عن جو الأستظراف السمج في رايئ ندخل في القصة..

" المعلمة دعاء" قاعدة بتشيش وأخر سلطنة.
" شاربيل " رايح جئ ياعيني بيشوف طلبات الزباين واكل العيش مر ، والأحسن نأكل فينو.
الصوت الجميل اللي احنا سامعينو دلوقتي هو صوت عمو فؤاد في البرنامج الإذاعي " كلمتين وبس "
وأقطع دراعي لو حد فيكم كان سامع حاجة.

" كلمتين وبس "
وطئ يابني صوت الراديو ده شوية ، وأصطبح وقول ياصبح. " المعلمة دعاء "
حاضر يا معلمة دعاء. " شاربيل "
معلش يا عمو فؤاد المعلمة مش حابة تسمعك النهاردة إظاهر والله أعلم ان مزاجها متعكر حبتين النهاردة ، وربنا يستر ويعدي اليوم ده علي خير. " شاربيل "
معلش يا شاربيل يابني أستحملها شوية ، أنا عارف انها مطلعه عينك وأنت عايز تقوم تولع فيها بس المعلمة بتاعتك برضه واللي تعرفه أحسن من اللي ما تعرفوش. " عمو فؤاد "
عندك حق ياعمو فؤاد ونهارك فل وصباحو قشطة. " شاربيل "
صباح اللي بتغني. " عمو فؤاد "

أنت أيه اللي أنت بتكتبه ده الله يحرقك هاتودينا في داهية هو ماحدش قالك أن " عمو فؤاد " الله يرحمه. "محمد"
بجد طب والعزا فين ؟؟؟. " المؤلف "
ياعم فوق من اللي أنت شاربه ده عزا ايه ، بس أيه دخل " عمو فؤاد " في القصة ؟!!!!
ثم إزاي أصلا " شاربيل " يتكلم مع الراديو والراديو يرد عليه أنت عبيط ؟. " محمد "
أنا أسف بالنيابة عن المؤلف يا جماعة عن اللي حصل هو بس كان بيهيس شوية ؛
فاصل ونواصل. " محمد "

" سلامو عليكو " " وعليكم السلام ورحمة الله وبركاته "
واحد شاي علي مية بيضة بس بسرعة وحياة أبوك يا شاربيل . " المعلم عابدين "
من عنيا يا معلم عابدين ، وعندك واحد شاي علي مية بيضة للمعلم " عابدين " وصلحه. " شاربيل "

ألا قولي يامعلم. " شاربيل "
نعم يا شاربيل . " المعلم عابدين "
أخبار اللحمة الأيام ديه أيه يا معلم ؟. " شاربيل "
أهوه زي ما أنت شايف السوق نايم والناس شكلها بطلت تأكل لحمة. " المعلم عابدين "
إزاي يامعلم ده أنت محل الجزارة عندك ولا سوق الجمعة !!!. " شاربيل "
لا دول بيشتروا عضم يا خفيف. " المعلم عابدين "
بجد طب مش كنت تقول ، خلاص وأنا مروح هاعدي عليك تكون جهزتلي ربع كيلو من الفخدة بس وحياة والديك تكون طرية. " شاربيل "

أنت يا واد يا شاربيل ...
أنت يا زفت سايب القهوة والزباين وعمال تهزر مع المعلم يالاً أدخل شوف طلبات الزباين. " المعلمة دعاء "
مخصوم منك نص يوم. " طبعاً المعلمة دعاء "

أيه النهار الأسود ده. " أكيد اللي طلعت عينه شاربيل "
بتقول حاجة يا شاربيل . " لا يا خواتي ايه العسل ده شايفين الرقة المعلمة دعاء "
لا ولا حاجة يا معلمة قلبك أبيض. " شاربيل "
طب يالاً أدخل شوف الزباين. " المعلمة دعاء "

صباح القشطة يا معلمة دعاء. " المعلم عابدين "
أهوه صباح. " المعلمة دعاء " . " واخدين بالكم من التناكة "

ليس بس كده يا معلمة ده حتي النهاردة الشمس طالعة والجو جميل. " المعلم عابدين "
ايه ياعم عابدين ...
أنت هاتمسك ترمومتر وتقولنا درجات الحرارة ولا ايه. " المؤلف "
لا مؤاخذة يا جماعة المؤلف رخم شوية ؛ تسمح تخليك في النص ومتعلقش علي كلام حد من الأبطال. "محمد"

مزاجك ماله متعكر ليه علي الصبح ؟
قوليلي بس مين أتجرء وزعلك و أنا بشرفي أعلقة زي الدبيحه وأبيع منه الكيلو بقرش. " المعلم عنترة بن شداد "
قد القول يا معلم. " المعلمة عبلة وحواليها صف كمانجات "

بس أنت عارف هو فيه حد الأيام ديه مزاجه رايق وليه نفس يضحك. " المعلمة نكد "

وعلي فكرة أنا ليا مزاج أضحك حتي شوفي :
" هات الأزازة وأقعد لعبني ديه المزة طازة والحال عجبني" ، " أوعي تكلمني بابا جئ ورايا ياخد باله مني يزعل ويايا ". " المؤلف "

ليه بس كده قولي فضفضي. " المعلم عابدين "
أنت مش غريب يا معلم وهاقولك. " المعلمة دعاء "
أنت عارف طبعاً إن القهوة ديه ورث بيني وبين أخويا وهو عايز يبيع القهوة ويأخد ميراثه ، وعارض عليا أني أشتري نصيبه أو يشوف حد يشتري القهوة ، وأنت عارف البير وغطاه. " المعلمة دعاء "

طب وهو نصيبه كده تقريباً يطلع كام ؟ " المعلم عابدين "
يعني إحنا لو عرضنا القهوة للبيع يبقي بالميت هاتجيب ربع مليون جنية لأننا بنبيع الأرض مش القهوة. "المعلمة دعاء"
لا ما تقلقيش يا معلمة هاتدبر بإذن الله ، طب بعد إذنك أروح أشوف المحل عشان سيبه لوحده. "المعلم عابدين"

يعني هايتوه ولا هايتوه لا هايتوه أبقي علمه برقبة إزازة. " المؤلف بيهيس "

المصدر: ACTION ACADMY أكاديمية أكشن - من قسم: أكشن همس أقلامنا

ugd fhf phvjkh

rill · منذ /20-08-2007, 12:09 PM

هههههههههههههههه مش ممكن عارف اسلوبك حلو بس تعرف بيفكرنى بنوع من الافلام ماعرفش نوعه انه بيشارك القارىء او المشاهد فى الاحداث
ماعرفش بجد اول مره اقرا النوعيه دى وماعرفش غريبه وحلوه وتعرف عشان خاطرى حاول تكمل انا اتبسط جدا وانا بقرأ

EGYPT4EVER · منذ /25-08-2007, 03:46 PM

بجد لزيزه جدا
بتفكرني بفيلم اجنبي مش فاكر اسمه كان جايب مولف وهو بيئلف قصه وكل شوي يطلع بتعليق في وسط المشاهد او يلاقي حد من الشخصيات مش عاجبه يقوم مغيره في وسط الفيلم
تسلم ايديك

thevampire · منذ /17-09-2007, 03:38 AM

هههههههههههههههه
يخرب عقلك يا ميدو
بتفكرنى بالفيلم بتاع مصطفى قمر و سمية الخشاب
و الراجل واقف فى النص
هاااااااااااف تايم
انت دماغك لاسعه رسمى

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري